Iduik Bak Rumpun Aua

Baa kakanyo rumpun aua,

Ataupun talang buluah bambu,

Walaupun tumbuah ditapi lereang.

Tanah suko tabiang mamuji.

Kok indak lah urek nan mangungkuang

Taban bandaro sadionyo.

Bukik pun indak taseso,

Lurah di bawah talinduangan,

Gagang manjelo dapek junjuang,

Maso rabuang carian urang,

kok gadang banyak manfaat,

Lah tuo paguno juo

Satinggi-satinggi batang batuang,

Pucuaknyo runduak ka bawah,

Manyilau bumi tampek tumbuah,

Guno nan tidak talupokan,

Sambia babisiak bakeh rabuang

Kok sampai kalian gadang

Usah lupokan jaso tanah,

Tau mambaleh budi baiak.

Lamahnyo pulo kadikatokan,

Maliuak di puta angin,

Manggerai dipupuik ribuik.

Bak cando-cando ka tumbang,

Jangan ka patah ratak tido.

Tapi tibo tapaso inyo kareh

Bisa malantiang ka udaro

Indak siapo ka manahan.

Satiok rueh basambilu,

Tiok buku bamatang pulo

Langkok jo duri jo miangnyo,

Namun tabungkuih dalam kalupak,

Dari lua tak nampak rupo

Usah di contoh Bak Tibarau

Iduik tibarau barumpun-rumpun,

Batangnyo barueh-rueh,

Badaun panjang bakalupak.

Kalau dipandang dari jauah,

Saroman bana bantuak tabu.

Raso amba indak batantu,

Pangicuah gadang kironyo.

Tarago ketek sabantuak jaguang,

Disilau indak babuah,

Bungo sahalai tak manaruah.

Kalau-inyo tumbuah di lereang

Atau di tanah katinggian

Sinan tabukak rasionyo.

Barambuih angin ka mudiak,

Tibarau madok ka mudiak,

Kok bakisa arah ka ilia

Inyo baputa kian pulo.

 

(Dikutip dari Album Pitaruah Ayah karya Yus. DT. Parpatiah)