Tiru Baringin di Tangah Padang

Baurek cukam ka tanah,

Jauah taunjam ka pitalo,

Panuahlah bumi di rumpunnyo.

Dek gampo indak tabukek-kan,

Dek badai alun ka ta-oleang,

Konon lah goyang angin lalu.

( Maksudnya :Berpendirian teguh, istiqamah dengan tauhid)

Kayu baringin bapucuak cewang ka langik,

Tinggi malepai awan biru,

Pidoman musafir lalu.

Daun rimbun buliah bataduah,

Bakeh balinduang kaujanan,

Paneh kaganti payuang panji,

Ureknyo tampek baselo,

Batang nan gadang kasandaran,

Dahan nan rampak ka bagantuang.

(Maksudnya : panutan di masyarakat, cadiak ka bakeh rang batanyo, kayo-ka tampek rang batenggang, bagak tumpuan ka mangadu. Satitiak katonyo di lauiktan, garak dibari jadi contoh, sifat ka suri jo tuladan, sumarak urang di nagari. Perduli deggan lingkungan)

Sungguahpun beringin tinggi manjulang,

Tapi tingginyo manungawi,

Bukan maimpok nan dibawah.

Walau gadangnyo tabirumbun,

Gadang manenggang ka nan ketek,

Urang nan indak takuik talendo

(Maksudnya: Ini merupakan sifat pemimpin, tidak menyalahgunakan kekuasaan, Berlaku adil dan bijaksana)

Usah ditiru Bak Kiambang

Iduik kiambang manyisiah-nyisiah

Kok inggok manapi-napi,

Katangah takuik dek galombang.

Lai baurek indak cukam,

Tajuntai kapalang turun.

Walaupun tumbuah nyo di aia

Tapi tarandam-randam nyo tak basah,

Tarapuang-rapuang nyo tak anyuik.

Biduak lalu awak basibak, dek angin badan batundo,

kok kunun riak mahampehkan.

(Maksudnya : Kiambang adolah simbol manusia rapuah, lamah darah bamental loyo)

(Disadur dari karya Yus. Dt. Parpatiah)