Kok indak dek hujan panjang
Indak ka tumbuah pisang nangko
Lah panek rasonyo daun kambang
Badan haram tapakai tido

Sio sio badan di batang
Dek urang buah nan nyo arokkan
Jantuang batuneh putiak datang
Pucuaklah tibo manggantikan

Kinilah masiek di palapah
Tajuntai layuah mamaluik batang
Oii rang ladang toloang lah rambah
Suruak baa badan ka lubang

Pado manyarok dalam parak
Bialah nak luluah jadi abu
Ta pakai raso ka indak
Elok manjadi umpan tungku

Maso dahulu kok di kaji
Badan masih urang pakai
Kabungkuih sabuak bungkuih kopi
Ka aleh kipang tangah balai

Kini saketek haram paguno
Urang nan indak acuah lai
Sajak plastik lah masuak toko
Badan hiduik umpamo mati

Malang bana nasib karisiek
Lah tuo hiduik marangeh
Dulu laweh kinilah cabiek
Jaso di badan hilang laleh

Dek ulah sayang ka batang
Dek ibo badan jo jantuang
Kini hiduik takulai panjang
Lah lapuak mati tagantuang